BAWACHA walijia juu sakata mauaji ya watoto

BARAZA la Wanawake la Chama cha Demokrasia na Maendeleo (BAWACHA), limewataka Waziri wa Mambo ya ndani ya Nchi, Mathias Chikawe,Waziri wa Jinsia Wanawake na Wanawake, Sophia Simba na Mkuu wa Jeshi la Polisi nchini (IGP) Ernest Mangu, kuacha kufanya siasa huku wimbi la kutekwa na kupotea kwa watoto likiwa linaendelea kwa kasi.

Mbali na kuwataka viongozi hao kuacha mbwembe katika kushughulikia utekwaji wa watoto, pia baraza hilo limemtaka Mangu kutumia nguvu za askari wake kukabiliana na watekaji na wauaji wa watoto, kama alivyofanya wakati wa kukabiliana na maandamano ya wapinzani wakati wakipinga Bunge Maalum la Katiba kuendelea na mchakato wake huku kukiwa hakuna uhakika wa kufikia muafaka wa kupatikana kwa katiba hiyo.

Hayo yalisemwa jana jijini Dar es Salaam na Mwenyekiti wa BAWACHA Taifa, Halima Mdee, wakati akielezea madhumuni ya Chama chake kufanya ziara ya siku 20 mikoani kwa ajili ya kuwazindua wananchi juu ya kuifahamu katiba iliyopendekezwa kabla ya kufanyia uamuzi wa kuikubali au kuikataa.

Mdee alisema Jeshi la Polisi lina wajibu wa kulinda raia na mali zao na kwamba linapokaa kimya hata pale kunapokuwa na taarifa za watu waliotenda uhalifu kunadhihirisha kuwa wanafurahia matukio hayo.

“Mmesikia mauaji ya hivi karibuni ya mtoto Gloria lakini mapema mwezi wa tatu mwaka huu mtoto mwingine anayeitwa Joshua alitekwa na kuuawa na wazazi wake wakasema wazi kuwa wauaji wa mtoto wake wanajulikana na sasa wanatanua mitaani…katika hali hii kwanini tusiseme waliomuua Gloria ndio hao hao walioachwa na polisi wakati walipomuua Joshua,” alisema Mdee.

Alisema sababu ya kumtaka Mangu, kuchukua hatua zinazostahili ni baada ya wasaidizi wake kushindwa kushughulikia matatizo hayo huku wakikanusha kila siku kuwepo kwa suala zima la utekwaji wa watoto.

Aliongeza kuwa kwa upande wa Waziri Chikawe anapaswa kulisimamia jambo hilo kwa kuwa jeshi hilo lipo chini yake na dhamana ya ulinzi wa raia na mali zao zinasimamiwa na walio katika wizara yake.

Kuhusu Waziri Simba, alisema wizara yake ina wajibu wa kuhakikisha mateso ya wanawake na watoto yanatokomezwa kwa kuyapigia kelele na kuchua hatua.

Mdee alisema linapokuja suala la kushughulikia watoto waathirika wakubwa ni wanawake ambao wanakabiliwa na matatizo mbali mbali baada ya serikali kushindwa kusimamia vipaumbele vyao.

“Wanawake wanapata madhila yote haya kwa sababu ya mipango mibovu ya serikali iliyopo madarakani leo wanatumia muda mrefu kutafuta huduma za msingi hata kuwaacha watoto wakiwa hawana uangalizi wa kutosha na haya ndiyo yanayochangia utekwaji na unyanyaswaji wa watoto,” aliongeza Mdee.

Awali Katibu Mkuu wa BAWACHA, Grace Tendega, akielezea madhumuni ya ziara yao, alisema watafika katika mikoa sita yenye jumla ya majimbo 20.

Alisema wakiwa katika majimbo hayo watawaelewesha wananchi hususan wanawake umuhimu wa kuijandikisha katika daftari la kudumu la wapiga kura, daftari la wakaazi pamoja na kuhamasisha juu ya kuwa na mtazamo sahihi wa Katiba inayopendekezwa kabla hawajaipigia kura.

Pia alieleza madhumuni mengine ya ziara hiyo ni kuwahamasisha wanawake kuwania nafasi mbali mbali za uongozi kuanzia uchaguzi wa serikali za mitaa utakaofanyika Desemba mwaka huu.

Chanzo: Tanzania daima